Ubusanzwe abanyarwanda baca umugani ngo uguhiga ubutwari muratabarana, ibyo si imigani yavuba hashize ibinyejana byinshi, kandi ngo uguhima atiretse arakubwira ngo ngwino turwane, abashumba nabo bati iyi ni renga renga urenge nkumene, amagambo yashira ivuga bati reka turebe imbwa n’umugabo!
Gen Ibingira Fred ubwo aheruka gusura akarere ka Musanze yari kumwe na Minisitiri w’ubutegetsi bw’igihugu yakoresheje imvugo isa nimwe muri izo nteruro zo haruguru ati “hari abo mu maze iminsi mwumva basakuza, bavuza induru bamoka ngo bagiye gufata u Rwanda, abo bose iminwa iradoze ntawakongera kuvuga, u Rwanda rwacu ruyobowe na Nyakubahwa Paul Kagame ntiruvogerwa.”
Mu mvugo ye itarimo amafefeko yavuze ko uzaba ashaka gutera u Rwanda azaba yigeretseho umutwaro uremereye atazabasha kwikorera.

Ibi yabitangaje mu gihe bamwe mu barwanyi b’inyeshyamba zabarizwaga muri Kivu y’amajyepfo, Karehe, n’ahandi bambukijwe umupaka wa Rusizi baherekejwe na Captain Dieudonné Kasereka uyoboye operation SOKOLA akabashyikiriza uyoboye ingabo mu burengerazuba bw’u Rwanda aho bakiriwe kuwa 17/12/2019 mu karere ka Rusizi.

Uganda irahekenya amenyo, iritsira ikubita agatoki ku kandi kubwo gutakaza abarwanyi benshi P5 hakiyongera umusoto w’umuryango wa Rutabana Benjamin urimo kuvuza iyabahanda, bivugwa ku mugaragaro ko Uganda izi irengero rye kurundi ruhande bati barigiza nkana bakiriza ayingwe kuko yagiye nta butumwa bwa RNC agiyemo ibyamubaho akwiye kubaga akifasha.
Izindi nkuru zivuga ko yaba yaraciwe umutwe igihimba kikajugunywa mu birindiro by’ingabo za RNC nkuko bitangazwa na Rushyashya.net yo amakuru bavuga ko yatangajwe na Marara Noble.
Abasimbutse urugamba rwa FRDC bahungiye muri Uganda, mw’ijoro ryo kuwa 3 rishyira 4 Ukwakira 2019, bahungiye Gisoro aho bavuye berekeza I Makenke-Mbarara bakaza kujyanwa I Kampala ku cyicaro gikuru cya CMI. Mbuya umubano urimo kidobya Perezida Kagame yabigarutseho kuwa 15 Ukuboza 2019 ubwo yari muri DOHA FORUM aho yagaragaje ko ikibazo kiri hagati y’u rwanda akigereranya n’amakimbirane ari muryango.

Perezida Kagame yagarutse ku butegetsi buriho muri Repubulika Iharanira Demokarasi ya Congo, avuga ko ari ubuyobozi bushyize imbere ubufatanye Tshisekede Felix Antoine, yagiye kubutegetsi yarasesemwe n’imitwe yitwaje intwaro yigaruriye igice kigihugu cye, akimara gufata ubutegetsi yihutiye kwiyegereza u Rwanda na MONUSCO, ngo bahashye izo nyeshyamba, uretse inyeshyamba zigometse kuri leta y’u Rwanda nyuma yo gutsindwa urugamba rwa 1/10/1990 rugakurikirwa na jenoside yakorewe abatutsi 1994, maze guverinema y’abatabazi igatsindwa ruhenu , yariyobowe na Dr. Sindikubwabo Theodore, we n’umufashawe bakaza kugwa muri RDC n’ubu bakaba batarashyingurwa, kimwe na Gen. Maj. Habyarimana Juvenal.

Akagabo gahimba akandi kataraza abandi bati uguhiga ubutwali muratabarana!

Mu gihe FARDC ikomeje kwivuga imyato, Mateke arajiginwa.

Ntabwo baratangaza ko bafashe abarwanyi ba Mai-Mai cyangwa RD-TABARA yo mu Burundi, yewe na ADF itaragaba igitero na kimwe mu gihugu cya Uganda nabyo bikaba ari amayobera y’ukwemera. Uretse abayobozi bakuru ba FDLR barimo Lt Gen Mudacumura Sylvestre wiciwe Bwito muri Kivu y’amajyaruguru muri Nzeri 2019, abo muri P5 urugamba rwa FARDC n’abafatanyabikorwa bayo abazarugira indahiro ni P5 ihuriwemo na PDP-Imanzi, FDU-Inkingi, PS Imberakur ya Me Ntaganda Bernard, RNC ya Gen Kayumba Nyamwasa, Amahoro People’s Congress ya Galican Gasana uzwi ku nyandiko ye yitwa Akamasa kazamara Inka kazivukamo, batakaje abarwanyi barimo 24 bafashwe bakazanwa mu Rwanda, ubu bakaba baragejejwe imbere y’ubutabera basangayo abarwanashyaka ba FDU Inkindi bategereje kumva imikirize y’’urubanza rwabo muri Mutarama 2020, hiyongereyo aba RNC bari mu itsinda rya Habibu Mudasiru, na LT Joel Mutabazi.
FARDC imaze iminsi ihiga buhongo imitwe yitwaje intwaro 1951 zafashwe 291 zashyikirijwe u Rwanda harimo abana 11. Zivuye mu ndiri yazo mu Ntara ya Kivu y’Amajyepfo kuwa 26 Ugushyingo 2019. Inkuru mbi itaha mu miryango yabo, maze abavandimwe babo baba mu Rwanda bavuza impundu kuwa 6 Ukuboza 2019 inkuru iba kimomo bambutse I Rusizi.

Harimo abasirikare bakuru nka Col Gatabazi Joseph alias Gatos Avemaria, wari ushinzwe ibikorwa bya Gisirikari muri MRCD, Col Ntamuhanga Anthere, Majoro batatu, hakiyongeraho uwiyita Cpt Nsengimana.

Uguhima atiretse arakubwira ngo turwane

FARDC bemeza ko FLN/CNRD iyobowe na Lt Gen Habimana Hamada nyuma y’ibitero bikomeye abarwanyi bayo bahungiye mu ishyamba ry’inzitane (PARC ya Kahuzi Biega hafi ya Bukavu, mu Burasirazuba bwa RDC, kuva ibitero byatangira FRDC yatangaje ko abarwanyi 600 ba FDLR bajyanywe mu Nkambi ya gisirikare ya Nyamunyunyi, abandi 400 bajyanwa Bitare muri Teritwari ya Kalehe, harimo abafatanywe intwaro 64 ntoya n’inini bakaba baragoswe n’ingabo mw’ishyamba ry’inkomane rya PINGA.
Abayobozi b’inyeshyamba bamaze iminsi batungurwa n’ibitero barimo Nshimiyimana Asifiwe Emmanuel bakunze ku byinirira Manudi, wari umuyobozi Mukuru wungirije w’umutwe udasanzwe w’inyeshyamba za FDLR-CRAP aho baciye ibico n’ingado muri Rutare, Njajo na Karehe.
FLN ntiyahiriwe n’urugamba barwana,nyuma yifatwa rya Nsabimana Calixite utegereje gukanirwa urumukwiye,yemera ibyaha byose aregwa ati “n’inyoni ziguruka zanshinja” yasimbuwe Nsengimana Herman nawe wafashwe akaba yagarutse mu Rwanda kuwa 17 Ukuboza 2019, amagambo yashize ivuga akayanyombya barashe amatama yombi iti “amagambo ashize ivuga!”
Amaraso y’inzirakarengane arasama!

Abarwana bakunze kuvuga ko baharanira amahoro,kandi bose bitwaza imbunda ku rutugu, uhereye kuri Murere, Shikaramu, n’abandi basenya ibyubatswe batera waraza y’amahoro, amaraso y’abene gihugu aseseka akanyobwa n’imbwa, n’inyamaswa zo mwishyamba, abandi ngo n’ibitambo bya demokarasi, iyi mbyino batera yikirizwa n’inkunda rubyino abandi bari munyungu zo kurwanira ubutegetsi cyangwa gusubiranamo nabo bahoze ari nshuti za soma mbike.
Ubisanga henshi muri Afurika yewe no hirya y’inyanja aho bagurisha imbunda inyeshyamba, batera n’inkunga zo kubaka ibikorwa birambye aho zijya gusenya bikitwa kurwanya igitugu.
Kayumba Nyamwasa ubwo yagiranaga ikiganiro n’ikinyamakuru cyo muri Zambia cyitwa e-News yagize ati” Inzira y’intambara yantwara imbaraga nyinshi, gukora icyo amahoro bivuze, iyo tuvuze amahoro ugomba kumenya ko ari urugendo rurerure kandi nicyo amahoro asobanura”
Ibi ntibibujije ko mu bafatirwa k’urugamba harimo abamushinja ko bari mu mutwe wa P5, iri jambo abarikoresha bahamya ko ari umutwe w’inyeshyamba zishaka gukura abanyarwanda ku ngoyi y’igitugu cya FPR, yavuyemo 2010 barafatanyije urugamba rwo kubohora u Rwanda 1994 bagahagarika jenoside yakorewe abatutsi mu Rwanda, ikamukamira ubwo yabaye umugaba Mukuru w’ingabo, aba Ambassadeur, aratunga aratunganirwa kugeza ubwo aburiye amahoro mu Rwanda aho ya yahaye abandi, ndetse igihugu gishusha nk’igihuru, ijoro n’umwijima bigota umutima nama we ananirwa kwihangana afata inzira arahunga ukuri nyako niwe ukuzi.
Ageze ishyanga ibyo avuga ko yahunze nibyo bamushinja, RNC iravuka bidateye kabiri inzira ibyara amahari, Dr. Rudasingwa aragenda, hakurikiraho Marara, arabasiga Nsabimana, arabura Rwalinda! Niko abato bashirira I Congo, amarira n’imiborogo mu Muryango wa Rutabana, yegura ku bushake Turayishimye, abanyakibuye barigomeka, aratabaza Tabita Gwiza, musaza we Ndwaniye Simon araruca ararumira abandi bati iyo inkoko kazi yabitse isake ihari biba ari ubukunguzi. Ntagara na Cpt Rutagengwa barirukanwa bagenda baseta ibirenge, kuko nta nduru irwana n’ingoma.
Ubwo Mont Jali News yabajije ibibaye Condo Gervais ati “Imisozi iratwara indi igatengata” yungamo ati “igihe kizatumara amatsiko, kandi kubabara siko gupfa, mu gusoza ati “erega Inkima yacurangiye inkende iti “kayumbu ka mama ndanyuzwe!”
Isekurume inyereye mu giheri, igiheri gikoma isekuru, isekuru ikoma akayunguruzo isekuru iti: aho bikubiye ndabyumvise!
Twifuje kuvugana na Turayishimye JP weguye ku buvugizi bwa RNC akaza no gusezererwa kumwanya w’ubushakashatsi Mont Jali News ntiyamubona kuri telephone ngendanwa.

Abivugira haribyo batangarije Mont Jali News bati:
Nyuma y’ibitambo by’abana b’aba nyarwanda bashiriye ku nkota ya FARDC bazira P5 bamwe baguye I Rwanda abandi baguye I Congo, imirambo n’imivu y’amaraso, iracibintu nk’inkota y’imbirima na Matovu mu bwanamukari kwa Bwanakweri , abaguye k’urugamba rwa P5, CNLD, FLN, FDLR abana babo bahinduka imfubyi, abagore baba abapfakazi, abibuka abafunzwe n’abazize za grenade za Remera na Nyamirambo, imirambo ya Nyabugogo na Kicukiro bagira bati: umwanzi umuha amata agacira amaraso, abo bose bahunze bakaba bifuza kuza barasa abanyarwanda amaraso azabasama, kuko uko byagenda ufashe ubugi bw’i nkota mu ntoki niwe ikeba.
bongeraho ko gusenyuka kwa RNC ubwayo yubakiye ku kiguri nunga, bashinjanya, Kayumba Nyamwasa yimitse baramu be muri Afurika y’epfo, abayanyakibuye nabo bubaka ikiguli muri Canada zibyaye mahari bashinjanya ubusambo, batangira kuryana nk’intozi.
Abandi bakagira bati “Rutabana Benjamin yabaye imbarutso ariko ibyo kumunara wa baberi byari byarayoberanye,bitabujije kuvugwa ko nubwo bamushakira Kampala ahubwo isha yafashe aka mabuye niba atarapfuye bahamyako yibereye I Kigali arinayo ntandaro yo gutsinda urugamba byihuse kuri FARDC n’abafatanya bikorwa bayo.
Ubugambanyi no guca icyuho ku bavuye muri FDLR, FNL, CNRD na RNC bakivamo nk’inopfu byahawe umugisha n’imbaraga z’abasirikare bakuru bakuwe I Kinshasa bakajyanwa mu kigo cya Gako, bagakumbuzwa gukunda igihugu no guharanira amahoro, amasomo bahakuye ubwo bagenzi babo bari I Mutobo, nubwo aya makuru bayaca hirya bivugwa ko inkeragutabara ziyobowe na Gen Ibingira Fred arizo zakoreye mu ngata FDLR, CNRD, FLN na P5 bituma inyeshyamba ziririmba urwo zibonye, aribyo Gen Ibingira avuga ati “hari abo mu maze iminsi mwumva basakuza, bavuza induru, bamoka ngo bagiye gufata u Rwanda abo bose iminwa iradoze ntawakongera kuvuga u Rwanda rwacu ruyobowe na Nyakubahwa Paul Kagame ntiruvogerwa” mu mvugo ye itarimo amafefeko yavuze ko uzaba ashaka gutera u Rwanda azaba yigeretseho umutwaro uremereye atazabasha kwikorera.
Aba Generali umunani barikumwe na Capt Twagiramungu wari ufite ubwene gihugu bw’ububiligi, aribo batanze amakuru bafatanya urugamba na FARDC bagenda berekana aho indiri z’inyeshyamba ziri akaba ari nayo mpamvu batarafata abo muri RED-TABARA, Mai-Mai ndetse ADF.

Abakurikirana ibivugwa n’abarwanya leta y’u Rwanda, bahamya ko gutsinda urugamba ari inzozi zibashuka kuko niba batabasha kwiyunga ntibazunga abandi, niba bicana hagati yabo badashobora gutabara, bakwiye kuba abagabo bagasubiza agatima impembero bagataha kuko nta muryango utagira ikigwari.

Uguhiga ubutwari muratabarana

Kayumba yiyibagije imisozi n’indaki yarayemo imyaka ine yose, ari k’urugamba byibuze ngo yiyunge n’umutima we atekereze abanyarwanda yarwaniye.
U Rwanda narwo mu ijwi rya Perezida Kagame Paul haricyo abivugaho, kuwa 14 Ukuboza 2019 Umugaba w’Ikirenga w’Ingabo z’urwanda yagize ati “Uko byagenda kose n’icyo byasaba cyose,ku buryo uzagerageza guhungabanya umutekano w’u Rwanda wese bigomba ku muhenda ku rwego rwo hejuru.”
Yungamo ati “Ndashaka kuburira abantu bamwe muri twe, bihisha inyuma y’ibintu bitandukanye, politiki, demokarasi, ubwisanzure, ibyo ari byo byose, ko dushaka kandi ni inshingano zacu guharanira ko habaho demokarasi, amahoro, ubwisanzure mu gihugu cyacu. Mbere na mbere ni twe tubishinzwe, twebwe, njyewe nawe,ku bantu rero bihisha inyuma y’ibidafite agaciro, ndetse bagashyigikirwa n’abantu bo hanze, bakaryoherwa… muraza kutubona.”
Yakomeje ati “Ntabwo waba hano ngo wungukire ku mahoro n’umutekano twaharaniye, twameneye amaraso mu myaka myinshi, ngo nurangiza unyure inyuma uduteze ibibazo. Tuzabashyira aho mukwiye kuba, nta kabuza.”
“Abantu bagize uruhare mu mahano ya Jenoside, bakomeje iyo politiki n’ingengabitekerezo yayo, barafunzwe, baza kurekurwa, mbere y’ibyo twarabababariye, barongera batangira gukina iyo mikino.
Turaza kubashyira aho mukwiye kuba muri,maze n’abo babiteraho urusaku, tuzarebe icyo bakora. Ndabwira abo bakomeje imikino bashaka kudusubiza aho twahoze ariko tukaba tumaze ku birenga”

“Irahinda igahita”

Muri rusange abaturage bifuza gukora bakiteza imbere,ntibifuza icyabasubiza mu ntambara z’inzitane,bahanganye n’ikibazo cy’ubukene bahuriyeho, kutagira aho bakinga umusaya,isenyerwa rya hato na hato, aho umujyi wa Kigali utangira usenyera abakene,ngo batuye mu bishanga, bibaza niba la Palisse I Nyandungu, n’Inyange byubatse ku Kirunga cya Kalisimbi, mu gihe Min Shyaka Anasthase yishongora ngo “ni basubire inyuma batarajya mu mitsi” yirengangiza ko yiteye akazana atazi akazaza na Musoni yari umugabo.

Min Shyaka Anasthase

Yibukije abanya Kigali ubwo Mutsindashyaka yababwiraga ngo bataha mu Byare nk’inyoni, ntibyatinze akiraramo 1930, Kabuye Rose ati” utifite azisohora muri Kigali, Ntibamukangishe ko ari bakavukire!
Umuturage ati” Prof Shyaka Anasthase wize akigisha, yirengagije ahubwo ko ari mu mitsi na Politiki, kuzamura umukene ariyo nshingano ya mbere abakene batariho ataba Minisitiri kuko abakire bafite byose bati “ko yasenyeye abaturage imvura igahita ntawe ihitanye ninde uzatanga impozamarira? n’ikigo k’igihugu cy’iteganyagihe gishaka guhinyuza Imana!”
Umuturage ati “Irahinda igahita, Bazivamo yagiye amahoro ntawe ahutaje!”

Mpariye abasomyi, Kandi Vugaziga n’umwana w’umunyarwanda!

Mont Jali News