Filime ‘Mulholland Drive’ yaje ku isonga ry’izibarirwa mu ijana zahize izindi mu kinyejana cya 21 nk’uko bigaragazwa n’urutonde rwakozwe na BBC.

Iyi filime yayobowe n’Umunyamerika David Lynch w’imyaka 70, yagiye hanze mu mwaka wa 2001. BBC yatangaje ko mu gukora uru rutonde harebwe filime zose zasohotse kuva mu mwaka wa 2000 kugeza muri 2016.

Mu gukora urutonde hifashishijwe impuguke mu bya sinema n’inararibonye mu gukora ubusesenguzi bwa filime bagera ku 177 mu bihugu 36. Urutonde rwa filime ijana za mbere nziza mu myaka 16 ishize, rwashyizwe hanze na BBC kuri uyu wa Kabiri tariki ya 23 Kanama 2016.

Iyitwa “Mulholland Drive” ya David Lynch (2001) niyo yagize amajwi menshi mu ibarura ryakozwe ikurikiwe na filime yakunzwe cyane “In The Mood For Love” yayobowe n’Umunya-Hong Kong , Wong Kar-Wai (2000) na “There Will Be Blood” ya Paul Thomas Anderson (2007).
Mu mpuguke 177 BBC yifashishije, abagera ku 122 ni ab’igitsinagabo mu gihe 55 ari abagore. Abantu 81 babajijwe ni Abanyamerika, 19 ni Abongereza, 5 bo mu Bufaransa, 5 bo mu Budage, Abahinde 4, Abataliyani 4 n’Umubiligi umwe.

Filime 57 kuri uru rutonde ziri mu rurimi rw’Icyongereza, 13 zikaba mu Gifaransa, 4 mu Cyesipanyolo, 3 ziri mu rurimi rwitwa Mandarin[ruvugwa mu Bushinwa] n’izindi ebyiri ziri mu Kirusiya.

Filime zasohotse mu mwaka wa 2012 na 2013 ziganje kuri uru rutonde, buri mwaka ufitemo izigera ku icyenda.

10. No Country for Old Men (Joel and Ethan Coen, 2007)
9. A Separation (Asghar Farhadi, 2011)
8. Yi Yi: A One and a Two (Edward Yang, 2000)
7. The Tree of Life (Terrence Malick, 2011)
6. Eternal Sunshine of the Spotless Mind (Michel Gondry, 2004)
5. Boyhood (Richard Linklater, 2014)
4. Spirited Away (Hayao Miyazaki, 2001)
3. There Will Be Blood (Paul Thomas Anderson, 2007)
2. In the Mood for Love (Wong Kar-wai, 2000)
1. Mulholland Drive (David Lynch, 2001)